الطريقة الصحيح لمعاكسة بنات حواء

من طرف **b7ar** الإثنين 9 يونيو - 21:44

جربت تعاكس بنت قبل كدا ؟

أكيد مش حأقول عزيزتي الفتاة هل اتعاكستي قبل كده؟ لأن مفيش واحدة في مصر متعاكستش !

عامة .. خلونا نبعد عن البنات شوية ونشوف الشباب المقهور لما يحب يعاكس بيقول إيه ؟ وبيعمل إيه ؟!

تهريج .. بتباتة !

شعب مصر شعب حميمي بطبعه،
بيحب الألفة والانسجام والضحك
، لدرجة إن في أحيان كتير بتتحول عنده المعاكسة لمجرد نكتة ..
طبعا طرق المعاكسة ومستوياتها كتيرة .. منها المعاكسة التبتة اللي
بيفضل الواحد لازق زى الدبان بعد المطر بالظبط ! ودا إما لجمال البنية الباهر
– في نظر الدبان طبعاـ أو لأنه حاسس إنه حيطلع من اللزقة دي بفايده !

وفيه معاكسة التهريج، شباب مرمي على النواصي مش لاقي حاجه يعملها
غير إنه يعاكس ويهرج على الماشيين ، والمعاكسة هنا بتبقى تهريج في الأول وفي الآخر،
حاجه لتضييع الوقت، وأهوه .. يمكن تطلع بفايدة برضه .. بس الأهم .. التهريج ..

مثلا تلاقي بنتين ماشيين ووراهم تلات ولاد، واحد بس اللي بيتكلم من الولاد
ومركز مع واحدة ( تتجوزيني والعصمة تبقى في إيدك ؟؟ ... تتجوزيني وأغسلك الصحون؟؟
.. طب تتجوزيني وأرضع العيال ؟ ) وتلاقي التلاتة ماتوا على نفسهم من الضحك ..
طبعا هو لا حيتجوزها ولا حيرضع العيال ولا حيشوف خلقتها بعد كدا .. بس بيضيع وقت وبيسلي نفسه ..

أو برضه تلاقي بنتين ماشيين وواحد بيكلم صاحبه ( أحلى واحدة فيهم اللي لابسه جزمة سودا )
.. ويا ويلهم لو لمحوهم بيبصوا على جزم بعض يأخذوهم تريأة للصبح!

مامتك نحلة ؟
وفيه معاكسات مفتكسة، مثلا الشاب من دول يرمى كلمة يحاول يشد انتباه البنت،
زى واحدة ماشي في حالها لا بيها ولا عليها تلاقي واحد متعرفوش بيبصلها
وفجأة يقف قدامها ويقولها ( لازم ماما كانت نحلة )
طبعا البنت حتفكر ( هو بيجيب سيرة الأم إبن الــ .. )
أو مش حتفهم عاوز ايه .. فحترد بنعم .. أو أفندم ..أو بتقول إيه يا جدع إنت
... هنا الواد ينط ويقولها بسرعة ( عشان تجيب العسل دا كله ) وهو شطارته بقى بعد كدا..

بس مش دايما الشطارة بتنفع .. واحد جرب الموضوع دا وقال أول جملة
.. راحت البنت بصاله بمنتهى
الثقة وقالته له ( إشمعنى ؟ ) بعد ما
خلص جملته راحت قايلاله ( تصدق .. وإنت لازم ماما كانت فرخة ..
عشان تجيب البيض دا كله ) طبعا صاحبنا قعد تلات أسابيع بعدها في البيت .. لحد ما يفقس !

والمعاكسات برضه مقامات يعني معاكسة الماشيين غير معاكسة الواقفين،
وأصحاب العربيات لهم طرقهم الخاصة تلاقي واحد بعربية واقف قدام واحدة
وهات يا كلاكس وعمّا ل يشاور على تحت وعامل مجنون في العربية ..
وبعدين يرجع مارشدير وهو باصص للبنت وبيقولها وهو مخضوض ( النمرة .. النمرة )..

طبعا البنت شافت نمرته وهو بيرجع أو مشافتهاش بس فهمت إنها نمرة العربية
من إشارته لتحت فحتقوله مالها ؟ .. هنا بقى تلاقي وش جديد تماما بيقولها ( مبتجمعش ! ... متديهالي تاني ؟! ) صوت حريمي .. اقفش !
ومع عن المعاكسة في التليفون قدمت قوي إلا إنها لسه شغالة لحد دلوقتي
ولان الدنيا اتطورت والتكنولوجيا دخلت البيوت وفي ظل نظام إظهار الرقم
ظهرت خدمات المعاكسات من تليفونات ميناتل والنيل ورينجو،
يعني الشاب من دول يشتري كارت بخمسة أو بعشرة وهاتك يا نمر
وهو ونصيبه وأول ما يرد عليه صوت حريمي يقفش فيه .. كدا على طول من غير
ما يعرف مين دي ولا سنها وشكل اللي جابتها عامل إزاى ( مش بأقولكوا شعب حميمي .. و مكبوت كمان )

وطبعا كل عشرتلاف مكالمة ممكن واحدة تكمل معاه عشر دقايق على الخط،،
وفي الأغلب حتبقى واحدة عندها 60 سنة فاضية هى كمان وبتشوف العيال المجانين دول بيعملوا إيه قبل ما تقفل !

وفيه معاكسة التليفونات المقصودة .. ودي عادة في المدارس .. واحد خد موبايل
واحدة معاه في الفصل ميعرفهاش من واحد صاحبه وقعد يزاولها من أى كابينة تليفون
.. أو يكون شافها مرة مع حد من صحابه وياخد تليفونها ويبتدي يظبط هو .. المهم .
. التليفونات أثبتت إنها كانت ولازالت وسيلة مهمة للمعاكسة !
من حقهم برضه !
قلت في أول الموضوع خلونا نبعد عن البنات شوية ، بس مش معنى كدا إننا ننساهم .
.لأنهم لب الموضوع يعني لو مفيش بنات الشباب هيعاكس مين؟
وفي ظل حكومة بابا حسني الرشيدة وتوجيهات ماما سوزان القوية بتمكين المرأة كان من
ضمن الحاجات اللي تمكنت منها المعاكسة طبعا لازم المرأة تساوي الرجل في كل حاجة حتى المعاكسة ..!

والجديد دلوقتي إنك تلاقي بنتين – عادة لابسين لبس المدارس الأبيض في كحلي –
ماشيين ورا واد وبيعاكسوه، والأجدد بقى إنك تلاقي الولد خايف منهم وبيبعد – هما عادة بتبقى أشكالهم تخوف
! – وهما ماشيين وراه وبيقولوا ( القطة خايفة ولا إيه ؟! ) ..

بس مش معنى كدا إن كل البنات اللي بيعاكسوا وحشين .. في بنات زى القمر وخبيرة معاكسة
.. يمكن من كتر ما سمعوا ! بس الموضوع بقى بالنسبالهم وسيلة تهريج .. just having fun) )

وبمناسبة أخينا اللي كان طالع يجري فوق دا ..
في ولاد كل مشكلتهم إنهم مبيعرفوش
يعاكسوا ! وخصوصا لو كان صحابه خبراء في الموضوع دا ..
ويا سلام بقى لو حصل تجاوب بين صاحبه والبنت اللي بيعاكسها ! حتلاقيه واقف بيضرب نفسه 100 جزمة

من طرف زائر الثلاثاء 17 يونيو - 7:11

ههههههههه وااله عندك حق معاكسات اليومين دول بقت نكته ربنا يهديهم وكمان يهدى البنات الى بتعاكس تايجر هيا دى موضه جديده ولا ايه؟؟؟

هههههههههههه جميلة اوي
وفعلا بقوا المعاكسات فكاهة
اعتقد يا tamtoma7oby هي موضة معاكسة البنات للشباب
ربنا يهدي الجميع
وهنشوف رأي تايجر برضه

من طرف **b7ar** الجمعة 20 يونيو - 19:37

والله موجود كل شيء
وعلى يدى وشفتها بعينى
طبعا الكل عارف كوبري عباس دة على النيل فى الجيزة
كنت ماشي هناك و جنبي مجموعه شباب مش اعرفهم
وعل الجانب التانى مجموعه بنات فتوقعت ان مثلا الشباب هيتكلموا هيعملوا اي حاجه
فجأةالاقى البنات بدأت تصفر ليهم وتشاور لهم وكان فيهم بنت شكلها مش من الكو بتاعهم
فبعدت عنهم فجريت عليها بنت منهم وقالت لها كلمتين راحت راجعه وبدأت تشاور معاهم
وطبعا الشباب ما صدق وعدوا ليهم ولا كأنهم يعرفوهم من 100 سنه يعنى لولا الملامة كانوا اخدوهم بالحضن
ودة موقف والبقية تأتى

الطريقة الصحيح لمعاكسة بنات حواء

الطريقة الصحيح لمعاكسة بنات حواء

رد: الطريقة الصحيح لمعاكسة بنات حواء

رد: الطريقة الصحيح لمعاكسة بنات حواء

رد: الطريقة الصحيح لمعاكسة بنات حواء