وميض ابتسامة

الحب ده فعلا كارثة

صحيح منقدرش نعيش من غيره
ولا نستغنى عنه
ولكن فى نفس الوقت منقدرش نسامح الخائن فيه
وساعات نضعف و نيجى على نفسنا شوية
وساعات تقفل معانا ومفيش تسامح
وزمان قالوا كل شىء جايز فى الحرب .. وفى الحب!!

وطبعا احنا عارفين قد ايه الحب ساعات بيبقى ذكى جدا وساعات للاسف بيبقى مفيش اهبل منه فى الدنيا وبرضه جدا .
وطبعا ح تسألونى ازاى ؟
ماشى .. الحب بيسمو بالقلب الى قمة الاحاسيس والمشاعر ويغذيه بكل الالوان والنجوم ويسقيه من اعذب الالحان ..كل ده من اجل ان يضمن سيطرته وهيمنته عليه ..وطبعا عشان القلب اصلا اهبل وعبيط وطيب .. يقوم يصدق الفيلم .. وينطلق ...وهنا مكمن الخطر ؟ ايوة مكمن الخطر ..لانه بسلامته وهو منطلق بينسى انه قد القى برماده السحرى فى عيون وآذان واحاسيس المحب الولهان فأصبح لايرى ولايسمع الا حبيبه فقط حتى لو كان .....!! ما علينا.

اما عن مظاهر الهبل والعبط فى الحب .... ان الحبيب هيمان على طول وبيبخ كلام وردى وطوبى وبمبى لايمكن لاى عاقل ان يصدقه ابدا ..ولكن للاسف حبيبته الهيمانة لا تكذبه ابدا ابدا .. فهى مسحورة وتريد ان تصدقه دوما فهو بابا وهو ماما وهو انور وجدى ..... " شغل عبط يعنى"!!

طيب يا جماعة .. عمركم سمعتم عن قصة حب خالدة لم تنتهى بمأساه ... !! للاسف لا؟
على فكرة الكلام ده ممكن يحصل فى الافلام ...يعنى شغل سينما
والعجيب فى الموضوع ان الناس بتعز النكد قوى!! يعنى تحب القصص المأسوية والدموع والاطلال وانى راحلة .. وحاجات من هذا القبيل ..

على فكرة انا مش ضد الحب ..لانى مؤمن ان الله قد خلقه فينا ... ولكن.. ماهو ضمان الحصول عليه والاحتفاظ به؟
لايوجد ضمان للاسف؟؟؟ ولكن!

الله سبحانه وتعالى كما اهدانا القلوب كى تنبض وتحب ..وهبنا ايضا العقول كى تفكر وتدبر وتكبح جماح القلوب

احنا عارفين ان الحب والقلب وجهين لعملة واحدة ..لكن مش بذمتك لو غلسنا على قلبنا وأقحمنا العقل فى الحدوتة اكيد ح نفرس الحب وح نوقفه عند حده ...ده مجرد رأى !!

وبدل من ان يسيطر الحب على قلوبنا ... فلنحكم نحن عقولنا الملغاه بأمر الحاكم بأمره "الحب" و نسيطر على قلوبنا الطيبة لعلنا نصل الى بر الامان.