والله منساك مهما طالت سنيني بقلمي

مني عهد ولا بي منك اي حاجه

الموت ما يقدر يفرق بينك وبيني

مادمت احبك وروحي فيك محتاجه

والله منساك مهما طالت سنيني

مصير يومٍ يجي وياك نتواجه

وننسى الفراق وقربك لي يداويني

الموت ياقلبي ابد لا يمكن علاجه

من بعد فرقاك حزني دوم طاويني

من عقبك العين من هالحزن ثجاجه

تنزف وداع وألم من حر ما فيني

والله فقدتك وفقدت الحب وامواجه

وفقدت بسمه شفاهً لي تواسيني

الحب لك وانته راسه وتاجـــه

والعمر بعدك مثل موتك يبكيني

أسير قلبي ويصعب غيرك فراجه

وحيد عايش ولا مثلك يسلينـــي

ياليتني قبرٍ يضمك واشعل سراجه

وابقى معك في برزخك ما تخليني

محتاج صوتك حبيبي واسمع ازعاجه

ومشتاق اشوفك ولو صمتك يحاكيني