يوم ما روحت املا الابليكيشن

انت متأكد يا احمد ان الشغل اللى بتقول عليه ده طالب جميع المؤهلات

يا ابنى الجورنال فى ايدى اهوة مطلوب جميع المؤهلات لاكمال الهيكل الوظيفى لشركة

طب خلاص هاقابلك عند باب الشركة كمان ساعة

يا ما انت كريم يا رب

و لبس صاحبنا و طار على مقر الشركة

احنا جايين عشان الاعلان اللى فى الجورنال

اه اتفضلوا املوا الابليكيشن و ان شاء الله تدخلوا للمدير

و مسكت الابلكيشن عشان املاه

1- الاسم

عمرى ما حبيت اتسأل السؤال ده طول عمرى باكره اسمى يوم ما كان يدخل علينا مدرس جديد و يسألنى على اسمى كنت بابقى نفسى الارض تنشق و تبلعنى

اصل اسمى ( حنفى سيد حنفى )

طب بذمتكم اتسمى على اسم جدى ليه عملت ايه فى دنيتى عشان ابويا يختار لى اسم جده اختاره من 80 سنه

طب ما هو اكيد ساعتها كان حنفى ده زى عمر و سيف اليومين دول لكن دلوقتى بقى وصمة عار

حتى يوم ما ماما حبت تدلعنى كانت بتقول يا حنفنف شوفتوا الهنا اللى انا فيه يعنى مش كفايه حنفى لأ بقيت حنفنف كمان


ده غير العيال اللى فى الشارع و فى المدرسة كل شوية حنفيه عايزة جلده حنفيه بتفوت حنفيه بتنقط

اقول ايه بس على ابويا الله يسامحه بقى

دى امى حتى اللى يسألها اسم ابنك الكبير ايه عشان يندهوا لها بيه بتقولهم سارة هى الكبيرة قولوا لى يا ام سارة رغم ان انا البكرى و الله العظيم

2- تاريخ الميلاد

29 / 1 / 1985

كان يوم مش فايت دايما ابويا يقول لى كده اصل انا يوم ما اتولدت ابويا اترفد من شغله و يا قلب امه اترفد اخر الشهر يعنى كانت مقفلة من كل ناحية

يالا يستاهل مش سمانى حنفى

3- الجنسية

مصرى

اكيد مصرى امال يعنى صينى ايه الغباء ده

ما هو مادام جاى اجرى ورا اعلان مش محددين فيه لا مرتب و لا طبيعة عمل يبقى اكيد مصرى

4- الحالة الاجتماعية

اعزب

اعزب غصب عنى و عن اهلى طبعا

انا نفسى و منى عينى طبعا ابقى متزوج و اعول لكن هاجيب منين

يعنى لو على الحب فانا حبيت و اتحبيت كتير قوى

لكن الكلام ده كان ايام الدراسة و اخر قصة حب عيشتها كنت ساعتها فى 3 معهد لكن من بعدها كل ما احب واحدة و اجى اتقرب منها

تقولى امكانياتك ايه عايز ترتبط بيا ما عنديش مانع لكن قولى هاتخطبنى امتى

اخر واحده قولت انا معجب بيكى

قالت لى و ماله بس خد بالك لو اتقدم لى عريس بكرة الصبح هاوافق عليه انت ما يرضيكش برضه اضيع مستقبلى عشان خاطرك . لكن لو ما اتقدمليش حد ادينى صابرة معاك يمكن ظروفك تتعدل

فمن ساعتها شلت موضوع البنات ده من دماغى اصل انا حساس قوى و اخاف لو واحدة سابتى اتقهر و اعمل فى نفسى حاجه

و طبعا ابويا لو قولت له ساعدنى عشان اخطب مش بعيد يطردنى من البيت و يطلق امى

5- الموقف من التجنيد

اديت الخدمة العسكرية و الحمد لله

صحيح اتمرمط فى الجيش و اتمنيت كان يبقى عندى فلات فوت او حتى التصاق زى علاء ولى الدين لكن هايجيلى منين ده انا عندى انيميا حاده بعيد عنكم

6- المؤهل

بكالوريوس خدمة اجتماعية

اعمل ايه بقى التنسيق الله يحرقه هو اللى عمل فيا كده انا عن نفسى كنت ناوى على طب بس المجموع بقى

7- التقدير

مقبوووووووووووووووووووووووووووووووووووول

اه باقولها و انا فخور بيها طبعا اساساً يعنى الحمد لله انى نجحت تقدير ايه اللى هاتسأل عليه كمان

هو انا كنت باذاكر من اصله ده لولا البرشام كنت اتسوحت و قعدت فى المعهد لغاية 2050 و يدينا و يديكم طولة العمر

8- العنوان

احنا ساكنين فى شقة ايجار قديم و صاحب البيت نفسه و منى عينه يطربق البيت على دماغنا و يبنيه من اول و جديد و يسكنه ايجار جديد لكن احنا ماسكين فى البيت بايدينا و سناننا

رغم انه جاله قرار ازاله بعد الزلزال لكن هانروح فين نترمى فى الشارع اهو البيت صامد و لسه ما وقعش

و ابويا قال احنا هانفضل فى البيت لحد ما يقع على دماغنا و انا قاعد معاهم طبعا

ما هو يا نعيش عيشة فل يا نموت احنا الكل

9- رقم التليفون

كان عندنا و اتشال اصل بعد ما البت سارة دخلت الجامعه و بقت بتقعد ترغى بالساعات فى التليفون مع اصحابها الفاتورة جت 200 جنية ابويا ساعتها حلف بالطلاق ما هو دافعها و قعدنا شوية استقبال لحد ما شالوا التليفون خالص

10- رقم الموبايل

اقول ايه بس على الموبايل اول ما جبت الموبايل كنت فى 2 معهد امى عملت جمعيه و جابت لى الموبايل هو صحيح كان مستعمل لكن كان بيأدى الغرض و كنت ساعتها معايا خط فودافون

جيت راكب الاتوبيس و مروح من المعهد اتسرقت

باتصل على الموبايل لقيت واحد رد عليا

و قال لى انا ما رضيتش ارمى الخط الا لما تتصل عشان اقولك ابقى هات بنطلون جيبه طويل شوية مادام شايل عده عامله زى ريموت التليفزيون . على الله الاقى لها بيعة زباين فقر صحيح و قفل السكة فى وشى

بعد كده ربنا قدرنى و قدرت اشترى عده تانية و حطيت فيها خط موبينيل عشان ساعتها كنت ماشى مع بت 012 فقولت اجيب زيها عشان الدقيقة تبقى ارخص بس بنت اللذين كانت بتقلبنى و تخلينى احولها رصيد من معايا

بس دلوقتى بعد عروض اتصالات الاخيرة غيرت و بقيت اتصالات اصل الدقيقة ب 19 قرش

11- الخبرات السابقة

و الله مش عارف اكتب ايه لو اللف على البيوت بالصوانى الميلامين يعتبر خبرة فهى دى الخبرة الوحيدة اللى عندى

اصل انا عقبال املتكم من ساعة ما اتخرجت و مالقيتش شغل طبعا لأنى كل ما اروح اقدم فى شغل يقولوا لى البكالوريوس بتاعك مش مطلوب

نزلت اشتغلت مندوب مبيعات و كنت بابيع 3 صوانى ميلامين عليهم طقم كاسات 6 قطع هدية

و اقعد اهابر مع الزباين ليل نهار ده لو رضيوا يفتحوا لى اصلا

ده غير اللى اول ما تشوف وشى تقولى لا مش عايزين

و لو ربنا اكرمنى و حد فتح و رضى يسمعنى اقعد اهاتى بقى

هدية لكل عروسة و مافيش بيت بيستغنى عن الحاجات دى طبعا و الله بنبيع بسعر المصنع و مافيهمش مكسب غير جنية واحد يبقى عايزة تاخدية ب 5 جنية بس ازاى و هو اصلا ب 15

و فى الاخر ما ترضاش تشترى منى بعد ما تنشف ريق اهلى

12- اخر مرتب تقاضيته

لو كتبت انى كنت باخد 120 جنية على اللف و الدوران طول اليوم اكيد هايضحكوا عليا و مش بعيد يعينونى على 150 و ساعتها هايبقوا عاملين معايا واجب كمان

انا الاحسن اسيبها فاضية و خلاص و هما و ذوقهم بقى

13- سبب ترك العمل السابق

الكالو اللى طلع لى فى صباعى الكبير من كتر اللف و الدوران فى الشوارع

14- الطول

طولى 161 سم عارفه من يوم ما روحت اعمل كشف الهيئة بتاع الجيش طول عمرى اصحابى يقولوا لى مش هاتدخل عشان قصير لكن عرفت ان اللى طوله معدى 160 سم يدخل

فقرى من يومى

15- الوزن

و الله ما وزنتش قبل كده لكن الواد احمد لما سألته قاللى اكتب 60 كيلو شكلك ما يجيبش اكتر من كده

خلصنا الابلكيشن و لقينا واحد طالع بيبص فيهم و راح قايل لاحمد ادخل قابل المديرو بص لى و قال لى انت لو احتاجنا لك هانبقى نطلبك

ليه طب يا فندم ما انا و زميلى نفس المؤهل لو عشان اسمى هاغيره

اسمك ايه و مؤهل ايه

امال فى ايه طيب

انت مش شايف جسمك عامل ازاى الوظايف اللى ناقصة عندنا ظباط امن و انت شكلك ما ينفعش
هو فيه وظيفة تانية مش عارف هاتناسبك و لا لأ

اى حاجة و مش مشكلة تكون بمؤهلى

مؤهل ايه اللى انت محموق عليه ده يعنى هانشغلك ايه بمؤهلك هو فيه شركة هاتطلب اخصائى اجتماعى هى مدرسة بنات يا ابنى . الشغلانة اللى عندنا ساعى . ايه رأيك ؟

و ماله اى حاجة احسن من قعدة البيت برضه اجى استلم الشغل امتى